Մոդելավորող
Գայանե Սարգսյանի հայրենասիրությունն իր արտացոլանքն է գտել «Իրիքնակ» հագուստի բրենդում, որի առաջնային նպատակը Արցախի պատմամշակութային ժառանգության պահպանումն ու աշխարհին ներկայացնելն է։ Ստեփանակերտում ապրելով՝ Գայանեն տարեցտարի վայելել է Արցախի տեսարժան վայրերն ու եզակի մշակույթը, ինչը հետագայում դարձավ «Իրիքնակի» ոգեշնչման աղբյուր։ Բրենդի հագուստներն առանձնանում են ավանդական զարդանախշերով, ինչը գնորդներին հնարավորություն է տալիս զգալ արցախյան շունչը։
Պատերազմն ու տեղահանումը խոչընդոտեցին ապրանքատեսակի տարածմանն ու ճանաչում գտնելուն, սակայն Գայանեի և մյուս համահիմնադիրների տոկունությունն ու նվիրումը անկոտրում էին։ Այդ ամենի ապացույցը տեղահանումից կարճ ժամանակ անց ստեղծված «Իրիքնակի» առաջին հավաքածուն էր, որը նվիրված էր Հադրութին` հատկապես Դիզափայտին։
«Իրիքնակը» հատուկ ուշադրություն է դարձնում, որ օգտագործվող նյութերը թուրքական ծագում չունենան, իսկ հայկական շունչը մնա անփոփոխ։ Հագուստի յուրաքանչյուր կտոր իր հետ ունի փոքրիկ քարտ, որը հիշեցնում է Արցախի օկուպացված տարածքների մասին՝ բրենդը դարձնելով և՛ նորաոճ, և՛ հայկական։ Բրենդի առանձնահատկություններից է նաև այն, որ ներքին շուկայի համար նախատեսված հագուստի ձևավորումը համապատասխանեցված է տարածաշրջանի կանանց կազմվածքին, իսկ արտաքին շուկայի համար օգտագործվում են եվրոպական ստանդարտներ։
Գայանեն ինքը, որպես բրենդի համահիմնադիր, միշտ փորձարկում է հագուստի նմուշները՝ դրանց հարմարավետությունն ու որակը գնահատելու համար. «Մեզ համար առաջնային է, որ հագուստը լինի հարմարավետ գնորդի համար, և մենք ինքներս էլ պոտենցիալ գնորդներ ենք»։
Բացի բիզնեսից, Գայանեն ակտիվորեն զբաղվում է լրագրությամբ՝ աշխատելով 301 մեդիայում և լուսաբանելով Արցախյան թեմաներ։ «Իրիքնակը» նրա կյանքում կարևոր դեր ունի, որը նա համատեղում է լրագրության ու հասարակական գործունեության հետ՝ մշտապես Արցախի ձայնը աշխարհին հասցնելու նպատակով։
