Հուրին հաստատվել է Հայաստանում 2012 թ.՝ Սիրիայի պատերազմի ժամանակ։ Մասնագիտությամբ կենսաբան – քիմիկոս է։ Բարձրագույն կրթությունը ստացել է Հալեպի Պետական Համալսարանի կենսաքիմիայի բաժնում։ Պատերազմի սկզբից ևեթ Հուրին և ամուսինը հասկացան, որ պատերազմի սարսափները, ռումբերի որոտը կարող են անդառնալի հոգեբանական հետևանքներ թողնել երկամյա դստեր զարգացման վրա, և, բնականաբար, փրկության ամենահասու հանգրվանը հայրենիքն էր։

Հուրին Սիրիայում չէր հասցրել ի գործ դնել իր մասնագիտական հարուստ պաշարը։ Այստեղ՝ Երևանում արագ աշխատանքի անցավ Արարատի կոնյակի գործարանի լաբորատորիայում՝ որպես մասնագետ։ Աշխատանքին զուգահեռ Հուրին ուներ իր հոբբին. խնամքի միջոցների պատրաստում՝ բնական հումքից։ Շուտով նրանք ընտանիքում համալրում ունեցան և բարդ ու պատասխանատու աշխատանքը դժվար էր համատեղել երեխաների խնամքի հետ, ուստի Հուրին որոշեց հիմնել սեփական բիզնեսը։ Նա պատրաստում է խնամքի միջոցներ՝ բացառապես բնական հումքից։

Հումքը ձերք է բերում Հայաստանում, լինի դա մեղրամոմ, թե խոտաբույսեր, որոնց օգտակար հատկությունների ուսումնասիրությանը և կիրառմանը ցուցաբերում է մասնագիտական մոտեցում։