Նազարեթ Արոյան

Նազարեթը ծնվել է Հալեպում։ Ծնողները Սիրիայում հաստատվել են ցեղասպանության տարիներին։ Ակունքներով Արևմտյան Հայաստանի Այնթապ գավառից են։ Վաղ տարիքում Նազարեթը կերցնում է հորը։ Տասներեք տարեկանում սկսում է զբաղվել գորգագործությամբ։ Ժամանակի հետ նրան գրավում է նաև արծաթագործությունը։ Նազարեթը հետագայում զբաղվում է նաև գորգերի և արծաթյա սպասքի ու զարդերի վաճառքով։

Հալեպում ուներ անտիկ և եզակի աշխատանքների հավաքածուներ, որոնք վաճառվում էին իր իսկ խանութ սրահում։ նրա համբավը հայտնի էր ողջ Հալեպում։ Հպարտությամբ հիշում է, որ Հալեպի Շերատոն հյուրանոցում ուներ իր պատվավոր խանութը՝ յուրահատուկ նմուշներով։

Պատերազմի ժամանակ, 2015 թվականին, արկի պայթյունից ավերվում է և իր սեփական խանութը, որ գտնվում էր հայկական Սրբոց Քառասնից Մանկաց եկեղեցու հարևանությամբ։ Ինքը հրաշքով ողջ է մնում, բայց հաջորդ օրը խանութը գտնում է զինվորների կողմից կողոպտված։ Չի տրտնջում, փառք է տալիս Աստծուն, որ ողջ է մնացել։ Նույն թվականին տեղափոխվում է Հայաստան։ Ցայսօր ցբաղվում է հավաքածուներ ստեղծելով և վաճառելով։ Նազարեթի մոտ մեկ անգամ այցելելը սկիզբն է նորանոր այցելությունների։