Յոլանդը և Ռաֆֆին ծնվել են Սիրիայի Հալեպ քաղաքում։ Նրանք երկուսն էլ ցեղասպանությունից մազապուրծ փրկված հայերի սերունդներ են։ Նրանց ծնողները ցեղասպանության տարիներին հաստատվել են Սիրիայում։ Նրանց հայեցի դաստիարակության արդյունքում իրենց սերունդները միշտ հոգեպես կապված զգացին հայրենիքին։ Ռաֆֆին Հալեպում ուներ մեքենաների մասերի պատրաստման փոքրիկ գործարան, որը նա ստեղծել էր իր ողջ հասուն կյանքի ընթացքում։ Սիրիայի պատերազմը, ինչպես շատ-շատերի, այնպես էլ Ռշտունիների ընտանիքում ապագայի շատ հեռանկարներ փոխեց և շատ երազանքներ կիսատ թողեց։ Ռշտունիները հաստատվեցին Հայաստանում 2012-ին։ Նրանց Հայաստան ուղղորդողը իրենց որդին Սարգիսն էր, որ 2008-ից արդեն ուսանող էր Երևանում։ Հայաստանում Յոլանդը զարգացրեց իր արևելյան խոհանոցի ուտեստներ պատրաստելու հմտությունը։ Մասնակցեց բիզնեսի զարգացման դասընթացների և ամուսնու օգնությամբ ստեղծեց իր փոքրիկ բիզնեսը։ Նրանք պատրաստում են արևելյան բաղադրատոմսով թխվածքաբլիթներ և անուշեղեններ, ձևավորում և փաթեթավորում դրանք։

Յոլանդին և Ռաֆֆիին Հայաստանում շատերն են ճանաչում։ 2020 թվականին Հայաստանի անկախության 29-ամյակին նվիրված «Մեր ժամանակների հերոսը» մրցանակաբաշխությանը նրանց շնորհվեց մրցանակ, որը նրանք հպարտությամբ և պատասխանտվությամբ են կրում։

Հիրավի, նրանց չկոտրվելու և կյանքը նորից սկսելու սխրանքը արժանի է դրվատանքի։