Հուրի, Սալբի Իփեքջյաններ

Հուրին և Սալբին քույրեր են։ Հայաստանում հաստատվել են 2015 թվականին՝ Սիրիայի պատերազմի արդյունքում։ Ակունքներով Արևմտյան Հայաստանի Այնթապ գավառից են։

Քույրերը տիրապետել են ասեղնագործության հմտություններին դեր վաղ մանկուց։ Նրանց առաջին ուսուցիչը մեծ մայրն էր, որը հայրենիքի սերն ու կարոտը ամբարում էր իր նախնիներից սովորած հայկական զարդանախշերի յուրօրինակ աշխարհում։

Հուրին և Սալբին հմուտ վարպետներ են և, ըստ այդմ, ունեն հանձնառություն սերունդներին փոխանցելու  իրենց և նախնիների գործը։ Հալեպի հայկական համայնքի օժանդակությամբ բազմիցս ուսուցողական դասընթացներ են կազմակերպվել քույրերի մասնակցությամբ։ Քույրերը հմուտ են Այնթապի, Ուրֆայի, Վանի և այլ նահանգների ասեղնագործության տարատեսակների մեջ։ Նրանց գործերը մեծ պահանջարկ ունեն սփյուռքի տարբեր գաղթօջախներում՝ ազգային տարազների, եկեղեցական հանդերձանքների պատրաստման գործում։

Մասնակցել են բազում ցուցահանդեսների թե’ հայրենիքում, թե’ արտերկրում և միշտ հիացրել ու զարմացրել են այցելուներին իրենց նմանը չունեցող գործերով։