Սեդա Թամոյան

Սեդայի պատմությունը սկիզբ է առնում Սիրայի Հալեպ քաղաքից։ Այստեղ է նա ծնվել, ապրել ու ստացել է իր բարձրագույն կրթությունը՝ մասնագիտանալով անգլերեն և արաբերեն  լեզուներում։ Տարիներ շարունակ աշխատել է որպես ուսուցիչ և իր գիտելիքներն է փոխանցել սերունդներին։ Բայց ճակատագիրն այլ ուղի էր ընտրել նրա համար։

 

2023 թվականին Սեդան տեղափոխվեց Հայաստան։ Այստեղ չէր կարող շարունակել աշխատել  ուսուցչի մասնագիտությամբ` կրթական և լեզվական տարբերությունների պատճառով, ուստի որոշում կայացրեց փորձել իր հմտությունները այլ բնագավառում։ Դեռ մանկության տարիներից սիրում և գնահատում էր ձեռքով պատրաստված յուրաքանչյուր աշխատանք: Ստեղծագործելու սերը նրան փոխանցվել էր մայրիկից։

 

Այսօր Սեդան իր աղջկա հետ հուլունքներից պայուսակներ է պատրաստում: Ստեղծագործում է սիրով՝ իր ունակությունները աշխատանքի մեջ դնելով։ Յուրաքանչյուր պայուսակ ծնվում է երկարատև ու մանրակրկիտ աշխատանքի արդյունքում՝ դիզայնի փուլից մինչև վերջին հուլունքի ամրացումը։ Մասնակցելով տարբեր ցուցահանդեսների, նա ամեն անգամ հուզմունքով ու երախտագիտությամբ է հիշում մարդկանց հիացած հայացքներն ու այն ջերմությունը, որը նրան մեծ հույս է տալիս շարունակելու ստեղծագործել, կատարելագործել իր արհեստն ու մեծ պլաններ կառուցել հայրենիքում իր գործը զարգացնելու համար։