Շանթ Քեշիշյան
Արծաթագործ
Շանթ Քեշիշյան՝ արծաթագործ, ով իր աշխատանքի մեջ առաջնային կարևորությունը տալիս է զարդերի որակին ու առանձնահատկությանը: Շանթը արմատներով Արևմտյան Հայաստանի Տիգրանակերտ քաղաքից է, սակայն, կիսելով հարյուր հազարավոր իր հայրենակիցների ճակատագիրը, ծնվել և մեծացել է Հալեպում, որտեղից էլ պատերազմից հետո՝ 2012 թվականին, ընտանիքով տեղափոխվել են Հայաստան: Տեղափոխվելուց հետո մոտ 3 տարի ունեցել են տարատեսակ ինտեգրման ու կայուն կենսակերպ հաստատելու դժվարություններ: Ի վերջո, ժամանակի ընթացքում կրկին իրենց գործով զբաղվելով, սկսել են աստիճանաբար ավելի ամուր կանգնել հայրենի հողի վրա: Շանթը ստեղծագործելու իր շնորհը ժառանգել է հորից՝ զարդերի աշխարհում անփոխարինելի ուսուցչից, ում աշխատանքին ուշադիր հետևելով, ժամանակի ընթացքում յուրացրել է պահանջվող բոլոր հմտություններն ու աշխատանքի նրբությունները: Նա ասում է, որ իր գործում ամենասիրելի մասը նորություն ստեղծելն է, կամ, ինչպես ինքն է ասում ՝ «նոր մոդել հանելը»: Բացի դրանից Շանթը ձգտում է ստեղծել այնպիսի զարդեր, որոնք կտարբերվեն մինիմալիստական լուծումներով, ինչը հնարավորություն կտա դրանք կրել ամեն օր՝ հատուկ առիթների չսպասելով: Կարելի է վստահորեն ասել, որ Շանթի արծաթակերտ ստեղծագործությունները յուրաքանչուր ժամանակակից երիտասարդի համար կարող են դառնալ անփոխարինելի նվեր:
