Մարտա Առաքելյան

Մարտան ծնվել և մեծացել է Արցախում։ 2023 թվականի սեպտեմբերյան իրադարձություններից հետո տեղափոխվել է Երևան՝ իր հետ բերելով հայրենիքի թանկ հիշողություններն ու ընտանիքից ժառանգած ձեռարվեստի ավանդույթները։

 

Մարտան չորս քույրերից մեկն է։ Նրանց ընտանիքում ասեղնագործության հմտությունը փոխանցվել է տատիկից մորը, ապա՝ դուստրերին։ Նոր կյանք սկսելու դժվարությունները նրան ու քրոջը մղում են սեփական գործը հիմնելու` ստանձնելով առաքելություն՝ պահպանելու հայկական մշակույթն ու արցախյան ոգին։

 

Մարտայի արվեստում առանձնահատուկ արժեք ունի տատիկի անավարտ աշխատանքը՝ խաչկար ասեղնագործությամբ գորգը։ Նախկինում չէր հասկանում, թե ինչու էին տատիկը, ապա նաև մայրը անավարտ թողել այն։ Միայն ասեղնագործել սկսելուց հետո զգաց, թե որքան հույզ, համբերություն ու նվիրում է պահանջում յուրաքանչյուր աշխատանք։ Այդ ժամանակ էլ հասկացավ տատիկի անավարտ աշխատանքի խորհուրդը, որն այսօր յուրահատուկ տեղ ունի նրա սրտում։

 

Այսպես ծնվեց «L’esprit de l’Artsakh»  ապրանքանիշը, որի աշխատանքներում արտացոլվում են հայկական զարդանախշերն ու մշակութային խորհրդանիշները։ Մարտան ձգտում է իր ստեղծագործությունների միջոցով պահպանել մշակութային ժառանգությունը՝ հատկապես երիտասարդներին ոգեշնչելով ճանաչել, արժևորել իրենց արմատներն ու դրանք փոխանցել գալիք սերունդներին։