Սալբի Քելեշյան

Սալբին ընտանիքով հաստատվել է Հայաստանում 2012 թ.։ Սալբիի կրտսեր դուստրը սովորում էր ավագ դպրոցում, և ծնողները նրան խոստացել էին ուղևորություն Հայաստան, եթե գերազանց հանձներ ավարտական քննությունները։ Այդպես էլ եղավ, բայց այցելությունը Հայաստան ավարտվեց մշտական բնակությամբ։

Սալբին մասնագիտությամբ ինժեներ է։ Հայաստանում մասնագիտությամբ աշխատելու հարցում բազում խոչնդոտներ կային։

Սիրիայում ահագնացող պատերազմը, Հալեպ վերադառնալու, այնտեղ թողած տունը, հիշատակները տեսնելու, հավաքելու, պահպանելու անկարողությունը Սալբիի հոգում առաջացրին փոթորիկ։ Եվ ահա Սալբին, կյանքում առաջին անգամ ձեռքը վերցրեց վրձինը և սկսեց իր հույզերը փոխանցել կտավին։ Այդ օրվանից Սալբին և կտավը անբաժան ընկերներ են։ Սալբիի նկարները պատմում են իր մասին, իր հոգեվիճակների ու, նաև, հայրենիքի բախտով ապրելու մասին։

Սալբին ժամանակի ընթացքում կատարելագործել է իր նկարելու աստվածատուր շնորհը։ Հիմա արդեն նկարում է տարբեր նյութերով ու կիրառում է տարբեր տեխնոլոգիաներ։ Մասնակցել է շատ ցուցահանդեսների, և բազմիցս արժանացել այցելուների անկեղծ գնահատանքին։

Հայրենիքը նրա համար հեռավոր երազանք չէ այլևս. ինքը մի մասնիկն է իր տառապած, բայց փառահեղ հայրենիքի։