Թալին Գրիգորյան

Թալինը ծնվել է Սիրիայի Հալեպ քաղաքում։ Տատն ու Պապը այստեղ հաստատվել են ցեղասպանության արյունալի  տարիներին։ Թալինի պապին թուրքերը խոշտանգել են, իսկ տատը հինգ երեխաների հետ կարողացել է հասնել Սիրիա։ Պապը Տիգրանակերտից էր, Տատը՝ Պոլսից։

Թալինը Հալեպում միշտ ակտիվ գործունեություն է ծավալել հայկական համայնքի ներսում։ Բարեգործական ծրագրերի իրականացման գործում մեծ ներդրում է ունեցել։ Հայ Օգնության Միության շրջանակներում մշտապես ընդգրկված է եղել կամավորական աշխատանքներում։

Ձեռագործություն սովորել է մորից և ավագ քրոջից։ Կատակով հիշում է, որ մայրը և քույրը շատ խստապահանջ էին իր նկատմամբ, իսկ ինքը շատ երիտասարդ էր և գործում էր ի միջիայլոց ու մտածում էր, թե ինչու ինքը պետք է անպայման ասեղնագործել իմանա։

Այն ժամանակ չէր պատկերացնում, որ տարիներ անց, արդեն Հայաստանում ձերագործությունը լինելու է իր մշտական զբաղմունքը։ Թալինը հմուտ է ձեռագործության տարբեր ճյուղերում։ Սիրով է պատրաստում յուրաքանչյուր աքսեսուար և հետևում, որ դրանք լինեն ինքնատիպ։

Թալինը ուժեղ կին է և, չնայած կյանքի դժվարություններին, երբեք չի կոտրվում և չի տրտնջում՝ արժանին մատուցելով իր աննկուն նախնիներին։