Արմիկ Ջոզիկյան

Արմիկը ծնվել է Սիրիայի Հալեպ քաղաքում։ Ծնողները նրան դաստիարակել են հայրենասիրական ոգով։ Ինչպես յուրաքանչյուր սփյուռքահայ ընտանիք, Արմիկն էլ ունի իր պատմությունը։ Նրա պապը Արևմտյան Հայաստանի Խարբերդ գավառից էր։ Ցեղասպանության տարիներին կորցրել է բոլոր հարազատներին և 13 տարեկանում միակն է եղել, որ կարողացել է հաղթահարել Դեյր Էլ Զորի անապատների երկար ու ձիգ ճանապարհը և միայնակ հաստատվել Հալեպում՝ ըստ էության “գաղթի ճամփեքը’’ իրեն տուն դարձնելով։ Հայրենիքի կարոտն ու սերը փոխանցել է սերունդներին։ Եվ ահա Արմիկի հայրը հորդորել է իր զավակներին բարձրագույն կրթություն ստանալ Երևանում։ Արմիկը Պետական Համալսարանի արևելագիտության բաժնում ուսումնասիրել է արաբերեն։ Այնուհետև ուսումնասիրել է հոգեբանություն։ Այս երկու մասնագիտությունները հիմք հանդիսացան, որ Արմիկը դառնա արհեստավարժ զբոսավար։ Արմիկը ունի նաև այլ հետաքրքրություններ, և, երբ ընտանիքում ծնվեց դուստրը, որոշեց ստեղծել սեփական բիզնեսը։

Պատրաստում է զարդեր բնական քարերից և այլ մետաղներից։ Նրա զարդերը շատ նորաձև են և մեծ պահանջարկ ունեն երիտասարդների շրջանում: Արմիկի նվերի տուփերը նույնպես շատ ճաշակով ձևավորված են, և կարելի գտնել նախնտրելի տուփը՝ ցանկացած առիթի դեպքում։