YMCA Europe միջազգային կազմակերպությունը "Roots for Peace" խաղաղության ծրագրի շրջանակներում, Սիրիահայերի Միության հետ համագործակցությամբ իրականացնում է նախաձեռնություն՝ պատերազմներից տուժած մեր հայրենակիցների համար: Նախաձեռնության նպատակն է ստեղծել էլեկտրոնային հարթակներ, որոնց շնորհիվ նրանց համար կբացվեն նոր հնարավորություններ բիզնեսի զարգացման համար՝ միևնույն ժամանակ հարազատ մնալով սեփական արմատներին:

Սույն նախաձեռնությունը չի վերաբերում սոսկ առցանց վաճառք կազմակերպելուն: Ծրագրի շահառուներից ամեն մեկը ունի իր սեփական պատմությունը, ուստի մենք ցանկանում ենք պատմել յուրաքանչյուրի մասին, քանի որ համոզված ենք, որ հետագա սերունդների համար չափազանց կարևոր է պահել կապը անցյալի հետ:

Ինչպես ծրագրի մասնակիցները ունեն իրենց պատմությունները, այնպես էլ նրանց ձեռքերով պատրաստված իրերը ունեն իրենց ստեղծման պատմությունը, և համաշխարհային ժառանգության տեսանկյունից շատ կարևոր է պահպանել այդ աշխատանքների պատրաստման ազգային եղանակները և ավանդույթները: